اشاعت کے باوقار 30 سال

پریانکا چوپڑا نے بین الاقوامی ایوارڈ اپنے نام کر لیا

پریانکا چوپڑا نے بین الاقوامی ایوارڈ اپنے نام کر لیا

کولکتہ: پریانکا چوپڑا کو ان کی سماجی خدمات کے صلے میں مدر ٹریسا میموریل ایوارڈ سے نواز دیا گیا۔ نامور بالی ووڈ اداکارہ پریانکا چوپڑا اپنی اداکاری کے علاوہ سماجی خدمات اور پناہ گزینوں کی مدد کرنے کے حوالے سے بھی ہمیشہ خبروں میں رہتی ہیں۔ وہ اقوام متحدہ کے ذیلی ادارے یونیسیف (یونائیٹڈ نیشن چلڈرن ایمرجنسی فنڈ)کی اعزازی سفیر بھی ہیں۔ پریانکا چوپڑا چند ماہ قبل اردن میں مسلمان شامی پناہ گزین بچوں کے ساتھ وقت گزارنے کے باعث بھی توجہ کا مرکز رہی تھیں۔ پریانکا کو دیگر سماجی خدمات اور شامی پناہ گزین بچوں کی مدد کرنے کے صلے میں مدر ٹریسا میموریل ایوارڈ سے نوازا گیا ہے، تاہم ان کی جگہ ان کی والدہ مدھو چوپڑا نے یہ ایوارڈ وصول کیا ہے۔ ایوارڈ وصول کرتے وقت مدھو چوپڑا کا کہنا تھا کہ بحیثیت ماں انہیں اپنی بیٹی پر فخر ہے۔ پریانکا بہت رحم دل ہے اور بچپن میں وہ مدر ٹریسا سے بہت زیادہ متاثر تھی۔ مجھے یقین ہے پریانکا یہ ایوارڈ حاصل کر کے بہت شکر گزار ہو گی۔ واضح رہے کہ پریانکا چوپڑا کے علاوہ مدر ٹریسا میموریل ایوارڈ پاکستانی طالبہ ملالہ یوسفزئی، عبدالستار ایدھی کی اہلیہ بلقیس بانو ایدھی، بھارت سے کرن بیدی، انا ہزارے، سشمیتا سین اور سدھا مرتی حاصل کر چکے ہیں۔

loading...