اشاعت کے باوقار 30 سال

آج کا دن تاریخ میں

زار نکولس دوم کی تخت نشینی

گینگ ریپ کا نشانہ بننے والی نوجوان لڑکی کے بارے میں ہیبت ناک تفصیلات

گینگ ریپ کا نشانہ بننے والی نوجوان لڑکی کے بارے میں ہیبت ناک تفصیلات

نئی دلی: بھارت میں ایک نوجوان لڑکی کی اجتماعی آبروریزی کے بعد اسے قتل کر کے لاش کتوں کے آگے پھینکنے کی اندوہناک خبر آپ سن چکے ہوں گے، لیکن مقتولہ کے باپ نے بیٹی کے قتل کے بعد اس کی لاش کے ساتھ کی جانے والی بے حرمتی کی ایسی تفصیلات بیان کر دی ہیں کہ سن کر انسان کی روح کانپ جائے۔ ایک رپورٹ کے مطابق مہیندر سنگھ نے بتایا ”میں بیٹی کی لاش کی شناخت کے لئے روہتاک کے پوسٹ گریجوایٹ انسٹیٹیوٹ آف میڈیکل سائنسز گیا۔ میں وہاں پہنچا تو دیکھا کہ اس کی لاش کوڑے کی ٹوکری میں پڑی تھی۔ اسے کسی نے سٹریچر پر رکھنے کی زحمت بھی نہیں کی تھی۔ میں نے اس کے کپڑوں سے اسے پہچانا اور اس کے گلے میں ایک مالا تھی جو اس کی ماں نے اسے چند دن پہلے تحفے میں دی تھی۔ اس کا جسم گہرے زخموں سے چھلنی تھا جن کے اندر کیڑے بھرے ہوئے تھے۔ ڈاکٹروں کو اس کے جسم سے 200 کیڑے نکالنے میں 4 گھنٹے لگے۔ میری بچی کی لاش پر چمٹے کیڑوں کا منظر میں کبھی بھی اپنے ذہن سے نکال نہیں پاﺅں گا۔“ 22 سالہ لڑکی کو اس وقت اغوا کیا گیا جب وہ معمول کے مطابق کام پر جا رہی تھی۔ مقامی پولیس کے مطابق لڑکی کو اجتماعی زیادتی کے بعد قتل کر کے ویران مقام پر پھینک دیا گیا جہاں کتے اس کی لاش کو نوچتے رہے۔ جب لڑکی کا پوسٹ مارٹم کیا گیا تو معلوم ہوا کہ اس کے جسم کے نازک حصوں پر بھیانک تشدد کیا گیا تھا جب کہ اس کے اندرونی اعضاءکو بھی نقصان پہنچایا گیا تھا۔ اس کے گلے میں بھی لوہے کی سلاخ داخل کی گئی تھی جب کہ سر کے بال کھینچ کر جلد سے الگ کر دئے گئے تھے۔ مقتولہ لڑکی کی ماں بید کور کا کہنا تھا ”میں نے کبھی ایسے ظلم کے بارے میں نہیں سنا جو میری بچی کے ساتھ ہوا۔ میری بچی ہمیشہ خوف زدہ رہتی تھی اور گھر کے دروازے کو تالہ لگا کر رکھتی تھی لیکن دیکھئے اسے کس طرح مار دیا گیا ہے۔ اس پر حد سے زیادہ ظلم کیا گیا ہے۔“ فورنزک ڈیپارٹمنٹ کے سربراہ ڈاکٹر سریش کمار کا کہنا تھا کہ لڑکی کی لاش کو ناقابل شناخت بنانے کے لئے اس کے چہرے کو بری طرح مسخ کردیا گیا تھا۔ اس کے سر کی ہڈیاں بری طرح ٹوٹی ہوئی تھیں۔ اسے متعدد افراد نے زیادتی کا نشانہ بنایا تھا جس کے بعد اسے قتل کیا گیا۔ پولیس نے 25 سالہ مرکزی ملزم ثمیت کمار کو گرفتار کر لیا ہے، جو ایک قریبی گاﺅں کا رہائشی بتایا گیا ہے۔