اردو ٹائمز(نیوز) تیل اور گیس کی تیزی سے بڑھتی ہوئی قیمتوں پر قابو پانے کے لئے امریکی سٹریٹجک آئل ریزروز میں اضافہ روک دیا گیا ہے جس کے لئے صدر بش نے قانون پر دستخط کر دیئے ہیں۔ امریکی سٹریٹجک آئل ریزروز میں اضافہ روکنے کا اعلان وائٹ ہا¶س کی ترجمان ڈیانا پرینو نے اپنے بیان میں کیا۔ بیان میں آئل ریزروز میں اضافہ روکنے کے لئے کی گئی قانون سازی کے بارے میں تفصیلات سے آگاہ نہیں کیا گیا۔ امریکی محکمہ توانائی کا کہنا ہے کہ آئل ریزروز میں اضافہ روکنے کے فیصلے پر قانون کے مطابق عمل کیا جائے گا۔ اس کے تحت آئل ریزروز میں اضافے کے لئے تیل کی سپلائی کی کسی کمپنی سے 6 ماہ تک معاہدہ نہیں کیا جائے گا جس سے 13 ملین بیرل تک خام تیل کی سپلائی متاثر ہو گی۔
