ٹوئنٹی ٹوئنٹی کی مقبولیت ون ڈے اور ٹیسٹ کرکٹ کو متاثر نہیں کررہی:ہارون لورگٹ

اردو ٹائمز(نیوز) انٹرنیشنل کرکٹ کونسل کے چیف ایگزیکٹو ہارون لورگٹ نے واضح کیا ہے کہ ٹوئنٹی ٹوئنٹی کرکٹ کی مقبولیت ون ڈے اور ٹیسٹ کرکٹ کو متاثر نہیں کررہی۔ جمعرات کے روز میڈیا سے بات چیت کرتے ہوئے انہوں نے کہاکہ ٹوئنٹی ٹوئنٹی کرکٹ کا آغاز انگلینڈ میں 2003 میں ہوا تھا اور اس کی مقبولیت میں اس وقت اضافہ ہوا جب جنوبی افریقہ میں ٹوئنٹی ٹوئنٹی کرکٹ ورلڈ کپ کا انعقاد کیا گیا۔ انہوں نے کہاکہ ٹوئنٹی ٹوئنٹی کرکٹ کی بدولت ہم پوری دنیا میں کرکٹ کو فروغ دے سکتے ہیں۔ ہمیں ٹوئنٹی ٹوئنٹی کرکٹ‘ ٹیسٹ اور ون ڈے کرکٹ کو ساتھ لے کر چلنا ہو گا ہم اس وقت ٹوئنٹی کرکٹ زیادہ دیکھ رہے ہیں کیونکہ بھارت میں انڈین پریمیئر لیگ جاری ہے۔