بھارتی ہاکی فیڈریشن کی نئی ایڈہاک کمیٹی نے اولمپک گیمز بیجنگ کے بعد ”ہوم اینڈ اوے“ کی بنیاد پر ہاکی سیریز کھیلنے کا عندیہ دیدیا

اردو ٹائمز(نیوز) بھارتی ہاکی فیڈریشن کی نئی ایڈہاک کمیٹی نے اولمپک گیمز بیجنگ کے بعد ”ہوم اینڈ اوے“ کی بنیاد پر ہاکی سیریز کھیلنے کا عندیہ دیا ہے۔ پی ایچ ایف کے ترجمان کے مطابق یہ بات بھارتی ہاکی فیڈریشن کی ایڈہاک کمیٹی کے اعلیٰ عہدیدار نے پی ایچ ایف کو فون پر بتائی۔ جواب میں پی ایچ ایف کے ہم منصب نے انکو بتایا کہ پاکستان بھی بھارت کے ساتھ ہاکی سیریز کھیلنے میں دلچسپی رکھتا ہے لیکن فی الحال انکی تمام تر توجہ اولمپک گیمز پر ہے اس کے علاوہ پاکستان ہاکی ٹیم اذلان شاہ کپ اور ایک ماہ کے دورہ یورپ میں مصروف ہے اس کے بعد اولمپک گیمز کی تیاریوں کے سلسلے میں قومی ہاکی کیمپ میں کھلاڑی مصروف ہو جائینگے لہٰذا اولمپک گیمز سے قبل کسی بھی سیریز کا انعقاد ممکن نہیں۔ یہاں یہ بات قابل ذکر ہے کہ 8مرتبہ اولمپک چیمپئن رہنے والی بھارتی ہاکی ٹیم 80سالہ تاریخ میں پہلی مرتبہ بیجنگ اولمپک کھیلنے سے محروم ہوئی ہے۔ تاہم پاکستان ہاکی فیڈریشن ان کی تجویز پر بیجنگ اولمپک گیمز کے بعد غور کر کے فیصلہ کرے گی۔
٭٭