امریکہ میں خام تیل کے مستقبل کے سودوں کی قیمت میں مزید کمی

 نیویارک(این این آئی) امریکہ میں خام تیل کے مستقبل کے سودوں کی قیمت میں مزید کمی ہوئی ہے جبکہ عالمی منڈی میں امریکی خام تیل کی قیمت 49ڈالر فی بیرل تک آگئی ہے ۔ ماہرین کے مطابق عالمی منڈی میں خام تیل کی قیمت جولائی سے اب تک تقریبا 95 ڈالر فی بیرل تک کمی آچکی ہے، اوپیک ممالک کے برانڈز پر مشتمل اوپیک باسکٹ پرائس 46 ڈالر کی سطح برقرار نہیں رکھ سکا اوریہ 45 ڈالر 89 سینٹ پر بند ہوا، ٹریڈنگ کے دوران لندن برینٹ خام تیل کے سودے 77 سینٹ کمی کے بعد 47 ڈالر 90 سینٹ کی سطح پر آگئے ۔ماہرین کے مطابق معاشی سست روی میں مزید شدت کے خدشات کے باعث خام تیل کی قیمت میں مسلسل کمی ریکارڈ کی جا رہی ہے۔