خلائی اسٹیشن کی زمین کے مدار میں موجودگی کے 10برس مکمل

ہیوسٹن(این این آئی)بین الاقوامی خلائی اسٹیشن کی زمین کے مدار میں موجودگی کو دس برس مکمل ہوگئے۔ خلائی اسٹیشن تین سو پچاس کلومیٹر بلندی پر زمین کے مدار میں ہے ، جس میں تین خلاءنورد مستقل طور پر موجود رہتے ہیں۔ آئندہ برس بین الاقوامی خلائی اسٹیشن کے عملے کو دگنا کرکے چھ کردیا جائے گا۔ اس سلسلے میں حال ہی میں فلوریڈا کے کینیڈی خلائی مرکز سے روانہ ہونے والی خلائی شٹل اینڈیوور سات خلاءنوردوں کو لیکر بین الاقوامی خلائی اسٹیشن پہنچی ہے، یہ خلاءنورد وہاں رہائشی سہولتیں بڑھانے کیلئے کام کررہے ہیں۔ زمین کے مدار میں موجود اس عظیم منصوبے پر ایک سو ارب ڈالرز لاگت آئی ہے جس کا سب سے بڑا حصہ امریکہ ادا کررہا ہے۔ دیگر ملکوں میں روس، جاپان، کینیڈا ، برازیل اور یورپی خلائی ایجنسی سے تعلق رکھنے والے گیارہ ملک شامل ہیں۔ وہاں جاپان اور یورپی یونین نے لیبارٹریز بھی نصب کی ہیں۔ بین الاقوامی خلائی اسٹیشن کو اعزاز حاصل ہے کہ نظام شمسی، مریخ اور دیگر خلائی مشن کیلئے اسے لانچ پیڈ کے طور پر استعمال کیا گیا۔