اسلام آباد: یوم یکجہتی کشمیر کے موقع پر صدر آصف علی زرداری نے اپنے پیغام میں کہا کہ پاکستان کی حکومت اور عوام آج یوم یکجہتی کشمیر اس عزم کی تجدید کے ساتھ منا رہے ہیں کہ وہ کشمیریوں کی منصفانہ جدوجہد کی حمایت جاری رکھیں گے۔ گذشتہ چھ عشروں سے کشمیری عوام نے اپنی آزادی اور وقار کی سر بلندی کیلئے بے پناہ قربانیاں دیں جو اقوام متحدہ کی قراردادوں کے مطابق حق خود ارادیت کے وعدے کی تکمیل اور اپنے لیے انصاف اور مساوات چاہتے ہیں۔ انہوں نے کہا کہ جموں و کشمیر کے تنازعہ کا پر امن حل تلاش کرتے ہوئے پاکستان کشمیریوں کے ساتھ اپنی مکمل یکجہتی کا اظہار کرتا ہے۔ کشمیریوں کی منصفانہ نصب العین کے لیے ان کی مکمل سیاسی، اخلاقی اور سفارتی حمایت جاری رکھیں گے۔