لاہور: چیئرمین پی سی بی ذکا اشرف کا کہنا ہے کہ آئی سی سی کی پابندی کے خاتمے پر فاسٹ بولر محمد عامر کو قومی ٹیم میں خوش آمدید کہا جائے گا لیکن کرکٹ میں واپسی کیلئے انہیں قانونی تقاضے پورے کرنا ہوں گے۔ انیس سالہ محمد عامر برطانوی عدالت کی سزا کی نصف مدت پوری ہونے پر بدھ کو رہا ہوئے ہیں۔ ان پر آئی سی سی کی عائد کردہ پابندی ستمبر دو ہزار پندرہ تک برقرار رہے گی۔  ذکا اشرف نے کہا کہ محمد عامر ابھی نوجوان ہے، اس سے غلطی ہوئی ہے۔ ہم کھیلوں کی ثالثی عدالت میں عامر کی اپیل پر کارروائی کے منتظر ہیں جب بھی اس کی پابندی ختم ہوئی اسے قومی ٹیم میں خوش آمدید کہا جائے گا تاہم ٹیم میں واپسی کا حتمی فیصلہ سلیکٹرز اس کی فارم اور فٹنس دیکھ کر کریں گے۔