پتہ نہیں روشنیوں کے شہر کو کس کی نظر لگ گئی ہے‘ جہاں امن و سکون کی سمندری ہوائیں چلتی تھیں اب وہاں آگ اور خون کی ہولی کھیلی جا رہی ہے۔ بھائی بھائی کو مار رہا ہے‘ ہمسایہ ہمسائے کو اور ایک ہی شہر کے باسی ایک دوسرے سے پنجہ آزما ہو گئے ہیں۔ نظریۂ سازش کو ماننے والے یہ کہتے ہیں کہ یہ سب کیا دھرا بھارت کی خفیہ ایجنسی را RAW کا ہے‘ کچھ اسے اپنوں کی سازش بتا رہے ہیں مگر اس سازش کا سرا ہاتھ نہیں آتا۔پاکستان جب بنا تو یہاں صرف سندھی لوگ آباد تھے‘ پھر تقسیم کے وقت بیشتر اردو بولنے والے مہاجروں نے ادھر کا رخ کیا‘ شروع میں ان کے درمیان چپقلشیں جاری رہیں جن کا نکتہ عروج 1973-74ء میں آئین سازی کے موقع پر ہوا۔ سندھی کسی حالت میں اردو کو سندھ کی زبان تسلیم نہیں کرتے تھے چنانچہ تصفیہ اس بات پر ہوا کہ سندھ کی دو زبانیں ہوں گی اردو اور سندھی۔اس دوران ایک نیا عنصر سندھ کی سیاست میں جڑیں پکڑنے لگا‘ ہمارے صوبے کے پشتون بھائی محنت مزدوری کے لئے کراچی کا رخ کرنے لگے اور یہ ان کا حق بھی تھا کہ پاکستان پر سب پاکستانیوں کا حق ہے مگر جوں جوں پشتونوں کی تعداد اور قوت بڑھنے لگی توں توں وہ سندھ و کراچی کے اردو بولنے والوں کی آنکھوں میں کھٹکنے لگے یہاں تک کہ دونوں قوتیں ایک دوسرے کے مخالف صف آرا ہو گئیں۔سندھی بیچ میں سے نکل گئے اور ان کی جگہ پشتون مہاجر مغائرت بلکہ نفرت بڑھنے لگی جسے دونوں اطراف کی سیاسی قیادت نے مزید ہوا دے کر چنگاری سے شعلہ بنا دیا۔ اس وقت عمومی فسادات کے علاوہ ٹارگٹ کلنگ کا بھی ایک نیا سلسلہ شروع ہوا ہے‘ کراچی و حیدر آباد میں پشتون آبادی کی تعداد کم و بیش پچیس سے تیس لاکھ تک جا پہنچی ہے اور سندھی و مہاجر دونوں کی سیاست میں خطرے کی گھنٹیاں بجنے لگی ہیں‘ ناقوس بج چکا ہے‘ حیرت کی بات یہ ہے کہ اتنی بڑی تعداد ہونے کے باوجود پشتون برادری انتخابی سطح پر کوئی بڑی کامیابی حاصل نہیں کر پائی اور اربن سندھ کے بیشتر ووٹ مہاجروں کے حق میں پڑتے ہیںیہاں بھی نظریہ سازش کے ماننے والے بڑے بڑے نظریے پیش کرتے ہیں مگر حقیقت یہ ہے کہ پشتون جہاں بھی ہوں ایک متحدہ قیادت کے زیر اثر نہیں رہ سکتے۔ دوسری طرف سندھیوں نے بھٹو فیملی کو اپنا سیاسی و انتخابی گرو مان کر سارا ٹنٹا ہی ختم کر دیا ہے‘ اب سندھ کے قوم پرست ہزار کف دردہاں سندھی عوام کے حقوق کی دہائیاں دیں سندھی عوام ووٹ صرف بھٹو کے نام‘ قربانی اور شہادت کو دیتے ہیں۔ تیسری طرف اردو سپیکنگ سندھ کو الطاف بھائی کی صورت میں ایک مضبوط لیڈر میسر آ گیا ہے‘ اب مہاجر وہ کچھ کرتے ہیں جو ان کا پیر لندن میں کہتا ہےآج تک عوام کے ایک طبقے کو ایسی متفقہ و متحدہ قیادت نصیب نہیں ہوئی۔ الطاف بھائی کے بارے میں ہزار کنسپریسی تھیوریاں پیش کی جاتی رہیں مگر حقیقت یہی ہے کہ الطاف بھائی کے ایک اشارے پر مہاجر اپنی جان دینے پر تیار ہو جاتے ہیں۔ اس کا اندازہ الطاف بھائی کے ٹیلی فونک خطابات اور ان میں شامل ٹھاٹھیں مارتے ہوئے عوام کے سمندر کو دیکھ کر لگایا جا سکتا ہے۔ کوئی مانے نہ مانے اربن سندھ کا بے تاج بادشاہ الطاف حسین ہی ہے اور رہے گا‘ متحدہ قومی موومنٹ نے کراچی و حیدرآباد کی انتخابی سیاست سے جماعت اسلامی‘ مسلم لیگ اور پی پی پی تک کو نکال باہر کیا ہے۔کسی زمانے میں کراچی جماعت اسلامی کا گڑھ ہوتا تھا اسے جتنی نشستیں بھی ملتی تھیں وہ کراچی سے ملتی تھیں مگر اب اسے وہاں کھڑے ہونے کی جگہ نہیں ملتی۔ مہاجر پشتون قضیہ ایک بہت بڑا بم ہے اس کو پھٹنے سے روکنے کے لئے دونوں طرف کی قیادت کو آگے بڑھنا ہو گا اور صدق دل سے ایک دوسرے کو تسلیم کر کے Co-Existence کا ثبوت دینا ہو گا۔ مہاجروں کو تو لیڈر شپ میسر ہے مگر افسوس کہ پشتون اپنی آزاد روی اور انفرادیت پسندی Individualism کی وجہ سے بٹے ہوئے ہیں ان کا یہ حال صوبہ خیبر پختونخوا میں بھی ہے۔